Deveze Kanboko auzapezari egin genizkion bilkura eskaera ezberdinei « arrapostua » jin da, bainan ez goaitatzen genuen gisan.
Auzapezak, bere lehen adierazpenetan ez zela bultzatua izan erranik ere, pleinta pausatu du, Jean-Noël Magis bere axuantarekin batera, bortizkeria jasateagatik.
Horrek beste hiru atxiloketa eragin du urriaren 2an. Laborantza eta etxebizitza eskubideen aldeko defentsan aritzen direnak jazartzeko usaia bihurtzen da. Goizeko 6etan polizia sarekadak, etxe miakekak, esku burdinen emaiteak, egonaldiak komisaldietan, laborari eta herritarren akusazio eta atxiloketa selektiboak : Marieniako lurren zimentatze proiektuaren kontra girenak, ez gaituzte ahulduko eta ixilaraziko, egunero elikatzen gaituztenen lan-tresna defendiatzeko borroka horretan.
Devèze auzapezaren gezurrak eta faltsukeriak salatzen ditugu:
- Dozenaka gira fermuki segurtatzen ahal dugunak: apirilaren 10eko gauean ez zen erasorik edo indarkeria fisikorik izan. Devèze jauna berak ondoko egunean prentsari adierazi zion: « ...pas d’altercations entre nous »
- Devèze jaunaren eta Euskal Elkargoko argumento nagusia : Marieniako lurrak ez lirateke landuak eta ez lukete laborantzarako interes agronomiko izpirik… Badakigu errealitatea guztiz kontrakoa dela !
Devezes jaunari, Kanboar gehienek eta 6.barrutiko herritarrek azken legebiltzarreko hauteskundeetan argi eta garbi erakutsi diotelarik: Marieniako lurrak laborantza lurra izaten segitu behar du. Hala ere tema eta itsutasun berdinarekin segitzen du eta goraki salatzen dugu jarrera hori.
Berriz deritzogu : Kanboko hautetsiek oraindik ere PLU alda dezaketela! Elkargoko hautetsiek ere bai. Horiei eskatzen diegu beren orientabideetan agertu dituzten erranak betetzea : "gure laborarien biziraupenerako laborantza funtsarentzat eta gure elikadura-erresilientziari buruz ezinbesteko geriza baten beharra " eta horren ondorioz beharrezkoak diren erabakiei buruz.
Nolanahi ere, otsailaren 11an Baionako auzitegira hurbiltzeko deia zabaltzen diogu jendeari , auzian lagunkideei sustengua emateko, eta menturaz lehenago ere Marieniako ordokia defendatzeko, Bouygues eta Devèzek beren betoinatzeko proiektua hasten badute.
MARIENIA EZ HUNKI!
